دادو (رپورٽ ذوالفقار سولنگي) ڊائريڪٽر ايڊمن سنڌ انفارميشن ڪراچي سردار محمد يوسف ڪابورو جو نوجوان فرزند مقصود احمد ڪابورو ڊينگي بخار سبب ڪراچي جي سائوٿ سٽي اسپتال ۾ لاڏاڻو ڪري ويو، جنهن جو مڙهه دادو ڀرسان اباڻي ڳوٺ فتح محمد ڪابورو ۾ آڻڻ تي هر طرف سوڳ وارو ماحول بڻجي ويو، مقصود احمد جي جنازي نماز شهيد مخدوم بلال جي جامع مسجد جي احاطي ۾ پڙهائڻ بعد شهيد مخدوم بلاول جي قبرستان ۾ تدفين ڪئي وئي، جنازي نماز ۾ ايم پي اي پير مجيب، برادري جي سردار قلندر بخش ڪابورو، اطلاعات کاتي جي منسٽر شرجيل انعام ميمڻ جي پي ايس اظهار حسين، ڊپٽي ڊائريڪٽر سارنگ لطيف چانڊيو، ڊپٽي ڊائريڪتر سرور سميجو، انفارميشن آفيسر لياقت جمالي، روزاني پاڪ سوچ اخبار جي ايڊيٽر ذوالفقار سولنگي، اعجاز سمون، الطاف ميمڻ ڊپٽي سيڪريٽري، ورڪس اينڊ سروس سياسي سماجي ۽ علائقي جي معززين وڏي انگ ۾ شرڪت ڪئي. بعد ۾ ڳوٺ فتح محمد ڪابورو ۾ تعزيتي دعا ڪئي وئي، جتي تڏو وڇايل آهي، تڏي تي وارثن سان تعزيت جو سلسلو جاري آهي.
