اسلام آباد (بيورو رپورٽ) مهانگائي وڌي وئي، هفتي دوران کنڊ، اٽي، مرغي، بصرن سوڌو 25 شين جي اگهن ۾ اضافو رڪارڊ ڪيو ويو: شماريات کاتي جي هفتيوار رپورٽ موجبڪڪڙ جي في ڪلو گوشت جي قيمت ۾ 36 رپيا 78 پئسا واڌ ٿي، جنهن کانپوءِ ملڪ ۾ ان جي سراسري قيمت 325 رپيا 50 پئسا ٿي وئي آهي. رپورٽ موجب هفتي دوران کنڊ 3 رپيا 22 پئسا في ڪلو مهانگي ٿي، جنهن سان ان جي سراسري قيمت 99 رپيا 22 پئسا ٿي وئي، سراسري قيمت 33 رپيا 49 پئسا وڌي 1145 رپيا 84 پئسا تائين ٿي وئي. رپورٽ ۾ چيو ويو آهي ته هڪ هفتي دوران ڪيلو 15 رپيا 83 پئسا في درجن، بيضا 7 رپيا 60 پئسا في درجن، بصر 2 رپيا في ڪلو، ڳائو گوشت 10 رپيا 51 پئسا في ڪلو ۽ ٻاڪرو گوشت 12 رپيا 49 پئسا في ڪلو مهانگو ٿيو، ان کانسواءِ چڻن جي دال، تازي کير، ڏهي ۽ چانورن جي اگهن ۾ به واڌ رڪارڊ ڪئي وئي. هڪ هفتي دوران 7 عام واهپي جي شين جا اگهه گهٽ ٿيا، ٽماٽا 5 رُپيا 71 پئسا ۽ مڱن جي دال 2 رُپيا في ڪلو سستي ٿي وئي.
مهانگائي وڌي وئي: هفتي دوران کنڊ، اٽي، مرغي، بصرن سوڌو 25 شين جي اگهن ۾ اضافو
