سکر نیشنل پریس کلب تي شهيد صحافي اي ڊي شر جي قاتلن جي گرفتاري لاءِ سکر يونين آف جرنلسٽس پاران احتجاجي ريلي، صحافين جو سخت ردعمل

سکر ٺري ميرواھ سان تعلق رکندڙ شهيد صحافي اي ڊي شر جي بي رحماڻي قتل خلاف سکر يونين آف جرنلسٽس پاران ڀرپور احتجاجي مظاهرو ڪيو ويو. ان موقعي تي سکر نيشنل پريس ڪلب کان گلوب چوک تائين احتجاجي ريلي ڪڍي وئي، جنهن ۾ وڏي تعداد ۾ صحافين، سماجي اڳواڻن ۽ شهرين شرڪت ڪئي.ريلي جي اڳواڻي پاڪستان فيڊرل يونين آف جرنلسٽس جي سينيئر اڳواڻ امداد ڦلپوٽو ڪئي، جڏهن ته سکر يونين آف جرنلسٽس جي جنرل سيڪريٽري ساحل جوگي، مسلم ليگ ن ضلع صدر خورشيد ميراني، ڊسٽرڪٽ بار سکر جي اڳواڻ ايڊووڪيٽ سڪندر جونيجو ۽ ٻين سينيئر صحافين به شرڪت ڪئي
مقررین پنهنجي خطاب ۾ چيو ته صحافي اي ڊي شر کي بي رحمي سان تيز ڌار اوزار سان قتل ڪرڻ هڪ انساني الميو آهي، جيڪو صحافت جي آزاديءَ تي سڌو حملو آهي. شرڪاء افسوس جو اظهار ڪندي چيو ته مرڪزي جوابدار منصور اعوان اڃا تائين پوليس جي گرفت کان ٻاهر آهي، جيڪو قانون لاڳو ڪندڙ ادارن جي ناڪاميءَ جو ثبوت آهي. احتجاجي ريلي ۾ شرڪت ڪندڙ صحافين ۾ ڪي بي شيخ،تاج رند،پراگ شرما، اشرف ابڙو،حبيب الله بلکاني، آدم شنڀاڻي،ضمير احمد گهنڃو، اسماعيل سومرو،دانش راجپوت، شبير جوگي، سبقت سولنگي، ملوڪ بلوچ،نعمان شاه،سرفراز چنه ۽ ٻين وڏي انگ ۾ شرڪت ڪئي.ريلي جي شرڪاء حڪومت کان مطالبو ڪيو ته قاتلن کي فوري طور گرفتار ڪري عبرتناڪ سزا ڏني وڃي ته جيئن ڪنهن به صحافي کي مستقبل ۾ پنهنجي جان جو نذرو نه ڏيڻو پوي. صحافين خبردار ڪيو ته جيڪڏهن جوابدارن کي جلد گرفتار نه ڪيو ويو ته احتجاج جو دائرو وڌايو ويندو ۽ سڄي صوبي ۾ مظاهرا ڪيا ويندا.