سنڌ حڪومت جي ترجمان سکديو آسرداس هيمناڻي چيو آهي ته مسلم دنيا جي پهرين عورت وزير اعظم محترمه شهيد بينظير ڀٽو جي نظريي مطابق پيپلز پارٽي واحد جماعت آهي جيڪا عورتن کي خودمختيار بڻائڻ تي يقين رکي ٿي

سنڌ حڪومت جي ترجمان سکديو آسرداس هيمناڻي چيو آهي ته مسلم دنيا جي پهرين عورت وزير اعظم محترمه شهيد بينظير ڀٽو جي نظريي مطابق پيپلز پارٽي واحد جماعت آهي جيڪا عورتن کي خودمختيار بڻائڻ تي يقين رکي ٿي، سنڌ حڪومت جي سرسو تحت غربت گهٽائڻ واري پروگرام تحت عورتن کي هنري سکيا، بغير وياج جي قرض فراهم ڪرڻ سميت گهر تعمير ڪرايا پيا وڃن ته جيئن ماڻهن جي غربت کي گهٽائي سندن حالت بهتر ڪري سگهجي. اهڙن خيالن جو اظهار هن گهوٽڪي ويجهو ڳوٺ عظيم ميڻڪ ۾ پيپلز پوورٽي ريڊڪشن پروگرام تحت هڪ ڪروڙ جي لاڳت سان وي آئي پي اسڪيم جي افتتاحي تقريب کي خطاب ڪندي ڪيو. ان موقعي تي سنڌ حڪومت جي ترجمان ڳالهائيندي چيو ته پيپلز پارٽي جي حڪومت جي منشور روٽي، ڪپڙا ۽ مڪان تحت پ پ چيئرمين بلاول ڀٽو زرداري پيپلز پوورٽي ريڊڪشن پروگرام شروع ڪيو جنهن تحت سنڌ جي ڳوٺن ۾ عورتن کي خودمختيار بڻائڻ لاءِ مختلف شعبن تي ڪم ڪيو پيو وڃي ان سلسلي ۾ عورتن کي هنري ۽ گهر ۾ سبزيون پوکڻ جي تربيت فراهم ڪرڻ سميت بغير وياج تي قرض فراهم ڪيا پيا وڃن ته جيئن هو پنهنجي پيرن تي بيهي پنهنجي خاندان کي خوشحال ڪري سگهن. هن چيو ته سنڌ حڪومت پاران شهري علائقن ۾ عورتن لاءِ پنڪ بس سروس شروع ڪرڻ بعد پنڪ اسڪوٽين جو پروگرام شروع ڪيو ويو آهي جنهن تحت موٽرسائيڪل هلائيندڙ عورتن کي گلابي اسڪوٽيون فراهم ڪيون وينديون اهڙو پروگرام تمام جلد گهوٽڪي ۾ به شروع ڪيو ويندو ته جيئن هتان جي عورتن کي به سهولتون ملي سگهن. هن چيو ته ڳوٺ عظيم ميڻڪ ۾ سنڌ حڪومت جي پروگرام تحت سرسو پاران بهترين ڪم ڪيو ويو آهي جنهن تحت هتان جون عورتون خودمختيار ٿيون آهن جن جو هنر ڏسي خوشي ٿئي پئي ته اسان جي ڀينرن ۾ بهترين هنر موجود آهي، ڳوٺ عظيم ميڻڪ کي ڇوڪرين لاءِ اسڪول ۽ صحت مرڪز ڏيارڻ لاءِ ڪوشش ڪنداسون تمام جلد کين سولر لائٽون فراهم ڪيون وينديون. ان موقعي تي هن ميڊيا سان ڳالهائيندي هڪ سوال جي جواب ۾ چيو ته پيپلز پارٽي جو سنڌو تي ڪئنالن خلاف واضع موقف آهي ان سلسلي ۾ وڏو وزير خط پڻ لکي چڪو آهي، اسين قانوني ۽ جمهوري طور لاڳاپيل فورم تي آواز اٿاريون پيا ته هي مسئلو ڪائونسل آف ڪامن انٽريسٽ ۾ آندو وڃي ڇو ته هي ڪو عام مسئلو ناهي. افتتاحي تقريب ۾ سرسو جي ريجنل مئنيجر عامر عباس ۽ ڊسٽرڪٽ مئنيجر عاشق علي ڪلوڙ سميت ڳوٺ عظيم ميڻڪ جي عورتن وڏي تعداد ۾ شرڪت ڪئي.