سکر 12 فيبروري 2025; ڪمشنر سکر فياض حسين عباسي جي صدارت هيٺ بجلي چوري جي روڪٿام ۽ ايل پي جي غير قانوني وڪري بابت گڏجاڻي ٿي. ان موقعي تي ڪمشنر سکر چيو ته سيپڪو عملدار بجلي چوري جي روڪٿام لا پوليس سان ڪوآرڊينيشن تيز ڪن, جن علائقن اندر بجلي جي بلن جي 100 سيڪڙو ادائيگي آهي ۽ ڪو به ڊفالٽر ناهي اتان جي عوام کي رليف فراهم ڪيو وڃي. ڪمشنر سکر فياض حسين عباسي سيپڪو جي عملدارن کي هدايت ڏيندي چيو ته سرڪاري اسپتالن ۽ ٻين سرڪاري آفيسن جي ٽرانسفارمرن مان غير قانوني ڪنيڪشنز ٿيڻ جي انفارميشن ملي آهي, اتي فوري طور تي وزٽ ڪري ڪنڊا ختم ڪرايا وڃن. جن علائقن اندر بجلي چوري گهڻي آهي اتي پوليس سان گڏجي جائزو وٺي بجلي چوري ڪندڙن خلاف ڪارروائيون تيز ڪيون وڃن. ڪمشنر سکر وڌيڪ چيو ته جيڪي سيپڪو عملدار ڪم ۾ سستي ڪن ٿا انهن خلاف قانوني ڪارروائي عمل ۾ آندي وڃي. ان موقعي تي ڊي آئي جي پوليس سکر فيصل عبدالله چاچڙ چيو ته بجلي چوري خلاف آپريشن ۾ پوليس سيپڪو سان ھر ممڪن سھڪار ڪندي , جيتري نفري گهربل هوندي فراهم ڪئي ويندي. بجلي چوري خلاف آپريشن ۾ ايف آئي آر لا پوليس کي ڪمپليننٽ بڻايو ٿو وڃي, پوليس جو ڪمپليننٽ ٿيڻ سان ڪيس مضبوط نه ٿيندو, جيڪڏهن ڪورٽ اندر ڪيس مضبوط ڪرڻو آهي ته لاڳاپيل کاتن جا عملدار ڪمپليننٽ ٿين. سپرنٽنڊنٽ انجنيئر سيپڪو سکر ۽ گهوٽڪي اجلاس کي بريفنگ ڏيندي ٻڌايو ته جن عملدارن ڪم ۾ سستي ڪئي آهي انهن خلاف ڪارروائي ڪندي کين نوڪري مان ڪڍيو ويو آهي. ان موقعي تي ڪمشنر سکر پاران ڊويزن ۾ غير قانوني ايل پي جو وڪرو ڪندڙن خلاف ڪارروائي تيز ڪرڻ جو حڪم ڏيندي چيو ته غيرقانوني ايل پي جو وڪرو ڪندڙن خلاف روزاني جي بنياد تي ڪارروائيون ڪيون وڃن, ڪمشنر سکر اوگرا کي ضلعي انتظاميه سان ڪوآرڊينيشن قائم ڪرڻ جي پڻ هدايت جاري ڪري ڇڏي. هن چيو ته غير قانوني ايل پي جي وڪرو ڪندڙ سان ڪا به رعايت نه ڪئي وڃي, دوڪاندارن خلاف فوري طور تي سخت ڪارروائي عمل ۾ آڻيندي دوڪان سيل ڪيا وڃن. غير قانوني ايل پي جي خلاف ڊويزن جا سمورا ڊپٽي ڪمشنر ۽ ايس ايس پيز ڪوآرڊينيشن قائم ڪري, اوگرا جي ايس او پيز تي عملدرآمد کي يقيني بڻائن, آفيسر ان معاملي تي ڪنهن به قسم جي ڪوتاهي نه ڪن, ٻي صورت ۾ سندن خلاف به ڪا رعايت نه ٿيندي. غير قانوني ايل پي جي وڪري خلاف اوگرا کي پڻ پروايڪٽو ٿيڻو پوندو. ان موقعي تي ڊي سي سکر ڊاڪٽر ايم بي راجا ڌاريجو بريفنگ ڏيندي ٻڌايو ته ضلعي سکر اندر صرف هڪ ايل پي جي جو رجسٽرڊ ڊيلر آهي. اجلاس ۾ ڊپٽي ڪمشنر سکر ڊاڪٽر راجا ايم بي ڌاريجو, ڊپٽي ڪمشنر گهوٽڪي ڊاڪٽر سيد محمد علي, ايس ايس پي گهوٽڪي ڊاڪٽر سميع الله, ايس ايس پي سکر اظهر مغل, ايس ايس پي خيرپور توحيد ميمڻ، ايس ايس پي اسپيشل برانچ منصور مغل, سپرنٽنڊنٽ انجنيئر آپريشن سيپڪو سکر مظفر حسين, سپرنٽنڊنٽ انجنيئر سيپڪو گهوٽڪي ظهور احمد, اسسٽنٽ ڊائريڪٽر احمد مصطفي, سميت ٻين لاڳاپيل آفيسرن شرڪت ڪئي.
ڪمشنر سکر فياض حسين عباسي جي صدارت هيٺ بجلي چوري جي روڪٿام ۽ ايل پي جي غير قانوني وڪري بابت گڏجاڻي ٿي
