ڪمشنر سکر فياض حسين عباسي جي صدارت هيٺ سکر- حيدرآباد ايم-6 موٽروي منصوبي جي لينڊ اڪيوزيشن جي سلسلي ۾ روينيو, سروي ۽ نيشنل ھائي وي اٿارٽي سميت ٻين لاڳاپيل کاتن جي آفيسرن سان ڪمشنر آفيس جي ڪانفرنس هال ۾ اهم گڏجاڻي ٿي گذري. ڪمشنر پاران ايم-6 موٽروي منصوبي جي لينڊ اڪيوزيشن ۾ سست رفتاري تي سخت ڪاوڙ جو اظهار, خيرپور, ڪنگري ۽ صوڀوديرو جي اسسٽنٽ ڪمشنرن کي فوري ڪم مڪمل ڪرڻ جي هدايت . ڪمشنر سکر فياض حسين عباسي چيو ته 2 مهينا اڳ سمورن کاتيدارن سان گڏجاڻي ٿيڻ باوجود خيرپور جي تعلقن اندر ڪم ۾ خاطرخواهه اڳڀرائي نه ٿي آهي, منصوبي جي لينڊ اڪيوزيشن ۾ وڌيڪ دير جي ڪا گنجائش نه آهي ڪم نه ڪندڙن خلاف سخت ڪارروائي عمل ۾ آندي ويندي. ڪمشنر سکر روينيو,سروي ۽ اين ايڇ اي کي پاڻ ۾ رابطا مضبوط ڪرڻ جي هدايت پڻ ڪئي ته جيئن ايم 6 جھڙي اھم منصوبي جي لينڊ اڪيوزيشن جو ڪم وقت سر مڪمل ڪري سگهجي. ان موقعي تي ڪمشنر سکر پاران اسسٽنٽ ڪمشنر روهڙي جي ڪارڪردگي جي واکاڻ ڪندي چيو ته اسسٽنٽ ڪمشنر روهڙي بهترين ڪارڪردگي ڏيکاري ٻين تعلقن لا مثال قائم ڪيو آهي. ڪمشنر سکر روينيو عملدارن کان سخت پڇاڻو ڪندي چيو ته تعلقي روهڙي ۾ وقت تي ڪم مڪمل ٿيو آهي ٻين تعلقن جي رفتار سست ڇو آهي, اسسٽنٽ ڪمشنر لينڊ اڪيوزيشن آفيسر آهن سڀ کان وڏي ذميواري انهن مٿان آهي. خيرپور ضلعي جي 3 تعلقن طرفان گذريل اجلاس کان بعد ڪا به اڳڀرائي نه ٿي آهي, خيرپور ,ڪنگري ۽ صوڀوديرو جي زمينن جا معاملا اڃا تائين حل نه ٿي سگهيا آهن. ھن چيو ته ايم-6 منصوبي ۾ سست ڪارڪردگي ڏيکاريندڙن کي وڌيڪ برداشت نه ٿو ڪري سگهجي. ڪمشنر سکر فياض حسين عباسي سروي سپرنٽنڊنٽ کي هدايت جاري ڪندي چيو ته سروي آفيس جلد قانوني گھرجون پوريون ڪري تعلقن کي ضروري دستاويز واپس اماڻي ته جيئن ايم 6 موٽر وي جي لينڊ اڪيوزيشن جو ڪم مڪمل ڪيو وڃي. گڏجاڻي ۾ ايڊيشنل ڪمشنر ٽو محمد حاجن اڄڻ, ڊپٽي ڪمشنر خيرپور سيد احمد فواد شاھ, ايڊيشنل ڊپٽي ڪمشنر سکر نهيد احمد, اسسٽنٽ ڪمشنر روهڙي لبيڪا اڪرم, اسسٽنٽ ڪمشنر خيرپور ارسلان ڦلپوٽو, اسسٽنٽ ڪمشنر ڪنگري محمد علي, اسسٽنٽ ڪمشنر صوڀوديرو رانا حسيب, اسسٽنٽ ڊائريڪٽر اين ايڇ اي ظهيرالدين چنا, سروي سپرنٽنڊنٽ خيرپور صلاح الدين سميت ٻين لاڳاپيل کاتن جي آفيسرن شرڪت ڪئي.
ڪمشنر سکر فياض حسين عباسي جي صدارت هيٺ سکر- حيدرآباد ايم-6 موٽروي منصوبي جي لينڊ اڪيوزيشن لاءِ اھم گڏجاڻي
