سکر ۾ وڌندڙ بدامنيءَ خلاف آل پارٽيز الائنس جي هنگامي گڏجاڻي، الائنس پاران بدامنيءَ خلاف احتجاجي تحريڪ هلائڻ جو اعلان. ن

سکر ۾ وڌندڙ بدامنيءَ خلاف آل پارٽيز الائنس جي هنگامي گڏجاڻي، الائنس پاران بدامنيءَ خلاف احتجاجي تحريڪ هلائڻ جو اعلان. جمعي واري ڏينهن امن امان جي بحالي لاءِ مسجدن ۾ دعائون ۽ بدامنيءَ جا مذمتي بيان ڪرائڻ، ڇنڇر واري ڏينهن گهنٽا گهر چوڪ تي علامتي بک هڙتال ڪرڻ ۽ 23 مئي تي آل پارٽيز ڪانفرنس ڪوٺائڻ جو اعلان ڪيو ويو. گڏجاڻيءَ بعد الائنس جي ڪنوينر مولانا محبوب سهتو جي اڳواڻيءَ ۾ وفد پنوعاقل مان اغوا ٿي ويل نينگر جي وارثن وٽ پهچي ڏک جو اظهار ڪرڻ سان گڏ نينگر جي بازيابي لاءِ ٿيندڙ احتجاج ۾ شرڪت ڪئي. تفصيل موجب سکر ضلعي ۾ اغوا، ڦر، ڌاڙن، چوري وڌندڙ بدامنيءَ جي واقعن متعلق آل پارٽيز الائينس جي هنگامي گڏجاڻيءَ ڪنوينر حاف محبوب سهتو قادري جي سربراهيءَ ۾ بندر روڊ حافظ حامد محمود فيضي جي آفيس ۾ منعقد ڪئي وئي. جنهن ۾ مختلف سياسي، قومپرست جماعتن، واپاري توڙي سول سائٽيءَ جي اڳواڻن مشرف محمود قادري، خورشيد ميراڻي، حافظ حامد محمود فيضي، اعظم خان، انور ڪمال، قاري لياقت مغل، غلام نبي گھانگھرو، شبير ميمڻ، ماجد ڏنور ڪاشف ، عبدالفتاح ابڙو ۽ ٻين شرڪت ڪئي. هنگامي گڏجاڻيءَ ۾ وڌندڙ بدامنيءَ واري صورتحال ۽ پوليس سميت لاڳاپيل ادارن جي غير سنجيدگيءَ تي ڳڻتيءَ جو اظهار ڪندي متفقه طور تي شهر ۾ امن امان جي صورتحال جي بحالي لاءِ احتجاجي تحريڪ هلائڻ جو اعلان ڪيو ويو. آل پارٽيز ڪانفرنس ۾ اڳواڻن پاران متفقه طور تي فيصلو ڪيو ويو ته وڌندڙ بدامنيءَ تي هاڻي وڌيڪ خاموش نٿو ويهي سگهجي، تنهن ڪري اڄ جمعي واري ڏينهن سکر جي سمورن مسجدن ۾ امن امان جي بحالي لاءِ دعائن سان گڏ بدامنيءَ خلاف مذمتيءَ بيان ڪرايا ويندا. جنهن کانپوءِ ڇنڇر واري ڏينهن گهنٽا گهر چوڪ سکر تي پوليس جي نااهليءَ، لاپرواهيءَ سبب وڌندڙ بدامنيءَ خلاف علامتي بک هڙتال ڪئي ويندي. اڳواڻن احتجاجي تحريڪ جو دائري ڪار وڌائڻ لاءِ 23 مئي تي آل پارٽيز ڪانفرنس ڪوٺائي وئي آهي. جنهن ۾ شرڪت جي لاءِ سمورن سياسي، سماجي، مذهبي، قومپرست جماعتن، واپاري تنظيمن توڙي سرگرم سول سوسائٽيءَ جي اڳواڻن کي شرڪت جي ڪوٺ ڏني ويندي. گڏجاڻي بعد آل پارٽيز الائينس جي ڪنوينر حافظ محبوب سهتو قادريءَ جي اڳواڻيءَ ۾ مختلف جماعتن تي مشتمل وفد پنوعاقل پهچي اغوا ٿي ويل نينگر محمد حسن آرائين جي والد ۽ وارثن سان ملاقات ڪري کين خاطري ڪرائي وئي ته هو نينگر جي بازيابيءَ لاءِ هر قدم تي ان سان گڏ بيٺل آهن، پوليس جي نااهليءَ سبب ڏوهاري گهر ۾ گهڙي پوري زندگيءَ جي جمع ڪيل ڪمائي ڦرلٽ ڪرڻ سان گڏ نينگر کي اغوا ڪري کڻي وڃڻ تي وفد پاران وارثن سان همدرديءَ جو اظهار ڪيو ويو.